| Բովանդակություն * | Այսօր առավոտյան համայնքապետարանում կայացավ աշխատանքային խորհրդակցություն: Բաժինների պետերի, սպասարկող ընկերությունների, ՀՈԱԿ-ների տնօրենների, համատիրությունների կառավարիչների հետ: Խորհրդակցության ընթացքում համայնքի ղեկավար Հակոբ Շահգալդյանը լսեց կատարված աշխատանքների և առաջացած խնդիրների մասին զեկուցումները: «Մշակույթ» ՀՈԱԿ-ի տնօրեն Արթուր Աբգարյանը խոսեց էներգախնայող լուսավորության լամպերի տեղադրման գործընթացի մասին: Նշվեց, որ արդեն LED տեսակի լուսավորություն ունեն 1-ին, 1ա, 4-րդ, 6-րդ թաղամասերը, այժմ աշխատանքներ են տարվում 3-րդ թաղամասում: Թաղամասերում աշխատանքների ավարտից հետո անցում կկատարվի նաև կենտրոնական փողոցներին: Մշակույթի, կրթության, սպորտի, երիտասարդության և սոցիալական աջակցության բաժնի պետ Արմինե Զաքարյանը տեղեկացրեց, որ նախադպրոցական հաստատություններում աշխատանքները նորմալ են ընթանում, բոլոր մանկապարտեզներում ապահովված է 18-22 աստիճան ջերմություն: Համատիրությունների կառավարիչները խոսեցին իրենց կողմից սպասարկվող տարածքներում կատարված աշխատանքների մասին: Աղբահանությունը համայնքում բնականոն հունով է կատարվել, հեռացվել են կոշտ թափոնները: Համայնքի ղեկավար Հակոբ Շահգալդյանը տվեց մի շարք նոր հանձնարարություններ: Ներկաներին համայնքի ղեկավարը տեղեկացրեց, որ մարտի 23-ին կազմակերպվում է համահայկական շաբաթօրյակ, որին պետք է պատրաստվել մեծ պատասխանատվությամբ՝ մաքրության աշխատանքներ կատարելով ամբողջ համայնքի տարածքում: Շաբաթօրյակի համակարգողը համայնքի ղեկավարի տեղակալ Վարդգես Չիլինգարյանն է:Իսկ վերջում Հակոբ Շահգալդյանը նշեց, որ այս տարի, եթե ստացվի մասնակցել համայնքների սուբվենցիաների ծրագրին, համատարած կասֆալտապատվեն համայնքի բակերը: |